ఎంతో ప్రతిభ ఎందుకు కాకుండా పోతోంది

బ్రహ్మ భోజనం చేసి వచ్చి మళ్లీ తన సృష్టి మొదలు పెట్టాడు .తన పనులు ముగించు కొచ్చిన సరస్వతి పక్కన కూర్చుంటూ అడిగింది
"ఈవేళ ఏవిటండీ సృష్టిస్తున్నారు .."
"అద్భుతమైన కొందరు ప్రతిభా వంతులని " "అని చెప్పి సీరియస్ గా పనిచేస్తున్నాడు ఆయన .
ఓ గొప్ప గాయకుడిని సృష్టించాడు భూమ్మీదకి వదిలాడు .ఆ తర్వాత ఒక మహత్తరమైన రచయత్రిని  , ఓ అపూర్వ మైన చిత్రకారుడిని ,ఓ ప్రతిభా వంతుడైన ఆటగాడిని ,సరస్వతి కోరికమీద ఓ గొప్ప సంగీత విద్వాన్సుడిని , సృష్టించి భూమ్మీదకి పంపించి "కొంతమంది  ప్రతిభా వంతులని సృష్టించి నందుకు చాలా ఆనందంగా ఉంది దేవీ .."భార్యతో అన్నాడు బ్రహ్మ .
కొంత కాలం గడిచింది .
తను సృష్టించిన ఆ కారణ జన్ములు ..కళాకారులూ ..ఎంత గొప్పస్థాయి లో ఉన్నారో చూడాలని బ్రహ్మ సతీ సమేతుడై భూమ్మీదకి వచ్చాడు .
గాయకుడు మధురమైన స్వరం తో ఎక్కడ పాడుతున్నాడా అని వెతికాడు . కనిపించలేదు .
లక్షలాది జనాన్ని రచనలతో  ఉత్తేజ పరచవలసిన  రచయత్రి కోసం వెతికాడు .కనిపించలేదు .
సంగీతకచేరీలలో విద్వంసుడి గురించి ,ఆట స్థలం లో ఆట గాడి గురించి ..వెతికి , కనిపించక , నిరాశతో సరస్వతి కేసి తిరిగి "ఏమయ్యారు వీళ్ళు ..ఒకొక్కరికి ఒక్కక్క కళలో గొప్ప ప్రతిభని ఇచ్చి పంపితే ..వీళ్లు ఏమయ్యారు .."అంటున్న ఆయన హఠాత్తుగా చూసి గుర్తుపట్టాడు వాళ్ళని ...
విద్వాన్సుడు ఓ బ్యాంకు మేనేజర్ గా  ఏవో లెక్కలు చూస్తున్నాడు విసుగ్గా .
రచయిత్రి పెద్ద కంపెనీ లో సేల్స్ సెక్షన్ లో  విరక్తిగా వర్క్ చేస్తోంది .
ఆటగాడు సాఫ్ట్వేర్ కం పేని లో కంప్యూటర్ ముందు చిరాకుగా  వర్క్ చేస్తున్నాడు .
ఎవరూ కూడా వాళ్ళ టాలెంట్ చూపించే అవకాశం లేని చోట బతికేస్తున్నారు .
"ఏవిటిఈదారుణంస్వామీ. .వీళ్ళు  ..వీళ్లు ..ఇలాగా .."సరస్వతి అంది .
బ్రహ్మ నిట్టూర్చాడు .
దేవుడు ఇచ్చిన టాలెంట్ ని , కళ ని,ప్రతిభని వదులుకుని ..వాటిమీద మనకున్న ఇష్టాన్ని చంపుకుని ....
పెద్దల కోరిక అనో ,
పరిస్థితుల కారణం అనో ,
భద్రత కోసమనో ,
భాద్యత కారణం గానో ..మనసుకు నచ్చని పని చేసే ప్రతి మనిషి 'బతికేస్తాడు '
తప్ప జీవించడు .
ఆ విషయమే చెప్పాడు బ్రహ్మ సరస్వతితో ..
"ఎంతో ప్రతిభ ఎందుకు కాకుండా పోతోంది దేవీ ..పుట్టించి పంపటం వరుకే మన భాద్యత .జీవించటం ఎలాగ అనేది ..తానే నిర్ణయించుకోవాలి మనిషి .అనేక కారణాల వలన అర్ధం లేని నిర్ణయాలు తీసుకుని తన లోని ప్రతిభని చంపుకుని అసంతృప్తి తో బ్రతుకులని ముగించేస్తున్నారు  ఈ మనుషులు ..పాపం "
చెప్పటం ముగించి బరువెక్కిన గుండెతో భాధగా వెళ్ళిపోయాడు భార్యతో కలిసి బ్రహ్మదేవుడు ..